عميد معهد القلب يحكي لنا ” قواعد طب القلب الاربعون ”
متابعة .. امل اللقاني
نشر الدكتور جمال شعبان، عميد المعهد القومي للقلب،
عبر صفحته الشخصيه لمواقع التواصل الإجتماعي ” فيسبوك ”
اربعون قاعدة لطب القلب واسماها قواعد طب القلب الأربعون
اليكم قواعد طب القلب الأربعون
1 لازم تكون طيب القلب قبل ما تبقي طبيب القلب.
2 لو انت مش من النوع الصبور طويل البال وبتعرف تقول حاضر ياباشا تمام يا أفندي ما تاخدش قلب.
3 السينيور بتاعك في النوبتجية دا اهم من ابوك واللي جابوك ادي له وضعه يديك عينيه
4 اوعي تفتكر انك موظف ه تمشي بانتهاء وقت النوبتجية عندك حالات بدأتها لازم تنهيها قبل ما تسلمها
5 لو عايز تستسهل روح أتخصص جلدية ما عندهمش طواريء غير أكيوت هرش فيليار
6 التطبيق ومتابعة الحالة ممكن يفتح لك باب primary intervention
7 اتعلم تسلم وتستلم علي مانفيستو… التسليم الكتابي ه يمنع عنك بلاوي كتيرة
8 تمريض الطواريء ايديك وعينيك دلعهم يدلعوك
9 في اي حالة Arrest خليك في الصدارة تركب التيوب وال سي ڤي پي دا مدخلك للقسطرة
10 اي حالة بيسميكر مؤقت ارشق فيها
11عيان القلب انسان مكروب اعتبره والدك او قريبك اتعلم تطبطب عليه
12 لازم تتعلم السياسة والقاء البيانات بلباقة لأهل العيان
13 اوعي تحسس اهل العيان في الطواريء انك زهقان او غير مهتم وإلا ه تجيب الضرب ليك وللسينيور ومش بعيد يكسروا لك الوحدة يا معلم
14 ما تدخلش الامن بينك وبين اهل العيان لو مش عايز تتضرب
15 اوعي تزحلق عيان علشان انت تعبان
16 اتعلم تاخد شيت بأدق التفاصيل
17 لو انت مش خريج لغات لازم تعلم نفسك انجليزي وتنطق كويس لان دا بوابتك للمحلية والعالمية
18اتعلم ازاي تعمل پاور پوينت پريزنتيشن ه تفك زنقة السينيور في محاضراته
19 اوعي تعتمد علي رسم القلب بس في حالات اوجاع القلب لازم تعمل رسم القلب مرة واتنين وتلاتة
20 الإنزيمات مش هي اللي بتحدد الدوا المذيب للجلطة ولا القسطرة خد اكشن بناء علي الاس تي
21 انت بتعالج عيان مش مونيتور قبل ما ترزع العيان دي سي شوك أتأكد ان دا مش ارتيفاكت
22 قبل ما تحكم علي العيان baseline راجع كذا لِيَد وبص ع العيان
23 قبل ما تدي الدي سي أتأكد انك بعيد عن السرير علشان ما تتلسعش يا معلم
24 لو تشخيص الريذم Unknown ما تديش cordarone
25 ما تديش ايزوبتين لعيان جاي ب wide complex وتقول دي سوبرا وذ ابريشن او آر ڤي أو تي
26 بلاش تعمل مناقشات بيزنطية علي نوع الريذم والعيان بيروح منك
27 أستشير في الحالات الصعبة خبراء كهرباء القلب اللي هم اصلا مش فاهمين هي ايه كهرباء القلب بس علشان تخلص ضميرك
28 اوعي تخلي فرحك بالبالطو الابيض وكلمة ايه رايك يا دكتور تفتي في مريض لان الغلطة بفورة الغلطة روح انسان يا مان
29 ما تزعلش لو دخلت اوضة كهربا القلب ولقيت شاشة مليانة بالطلاسم تلات ارباع اللي قاعدين في الكونترول رووم مش عارفين هم بيبصوا علي ايه
30الإي بي أس يا ابني بحر عميق وسكة اللي يروح ما يرجعش لو مالكش زوجة ولا اهل ووارث من اهلك قرشين أتخصص فيه
31ما تضيعش وقت كتير في الماجستير لان الأقدمية بتحسب بعد الدكتوراه
32 الماجستير هو اكل العيش اوعي تفتكر انك بقيت دكتور قلب بعد الماجستير
33 ما تجريش علي القسطرة قبل صنفرة مخك بالعلم واتقان الطواريء والرعاية
34 الدكتور الشاطر في العلم ه يبقي شاطر في القسطرة فالقسطرة قرار اما المهارات الفنية فالممرضة والفني يقدروا يعملوها احسن منك
35 ما تتنططش علي زميلك دكتور الباطنة بمعرفتك في رسم القلب لانه هو اللي بيحول لك الحالات بعد كدا
36 خلي علاقتك كويسة مع جراح قلب لسببين هو اللي ينقذك من مزانق كتير ثم انه عزيز قوم ذل
37 لو داخل وفاكر انك بعد سنتين ه تبقي في القسطرة في لمعان عادل امام او الاتربي تبقي واهم يا معلم
38 حاول تاخد رسالة الماچستير حاجة تتعلمها مش تفبركها ولازم تبقي فراكيكو بتنطط في كل حتة واسأل يمكن تلاقي حد سينيور قلبه يحن ويقول لك كلمة و ما تزعلش لو قعدت في اوضة الكونترول رووم في القسطرة فترة طويلة بدون ما تتعقم التعليم يبدا في الكونترول
39المؤتمرات مش علم وبس لازم تتعلم ت socialize الناس تعرفك وتعرفهم
40 بلاش الله يهديك البدلة ورباط العنق قبل الدكتوراة … دي من مناقب الاستاذية وانت لسه مش استاذ .
